د شکایتونو د ثبت کمیسیون

د شکایتونو د ثبت کمیسیون د نړۍ له هر هېواد څخه د بشري حقونو د سرغړونو، تبعیض، ګواښونو، ظلم، بي عدالتۍ، تاوتریخوالي او نورو اړوندو ستونزو په اړه شکایتونه ترلاسه کوي، ثبتوي، مستندوي او د موضوع د نوعیت له مخې یې اړوندو کمیسیونونو ته راجع کوي.

د افغان انساني حقونو نړیوال سازمان د دولتي محکمو په څېر د قضایي فیصلو د صادرولو صلاحیت نه لري؛ بلکي د بشري حقونو د سرغړونو موارد ثبتوي، مستندوي او د حل لارو د موندلو لپاره یې له اړوندو دولتونو، ادارو، سازمانونو او بنسټونو سره د رسمي اړیکو، خبرو او همکارۍ له لارې تعقیبوي. هغه جدي حقوقي قضیې چي د قانوني او قضایي تعقیب اړتیا ولري، د سازمان د مدافع وکیلانو او قضايي چارو کمیسیون له لوري د موجودو قانوني لارو او اړوندو محاکمو له لارې تعقیبېدای شي.

د نړۍ له هر هېواد څخه چي د بشري حقونو اړوند شکایت سازمان ته ورسېږي، موضوع د اړوندو معلوماتو او اسنادو پر بنسټ ارزول کېږي او د اړتیا په صورت کي د موضوع د حل لپاره د اړوند هېواد له سفارت، بهرنیو چارو وزارت، اړوندو ادارو او نورو مراجعو سره د ایمیل، تلیفون او رسمي اړیکو له لارې لازمې خبرې او همغږي ترسره کېږي. د سازمان اته کمیسیونونه هر یو د خپلو ځانګړو دندو، مسئولیتونو او صلاحیتونو په چوکاټ کي د اړوندو موضوعاتو په تعقیب او ارزونه کي ونډه اخلي.

افغان انساني حقونو نړیوال سازمان ته د نړۍ له بېلابېلو هېوادونو څخه په دوامداره توګه ګڼ شمېر شکایتونه او برېښنالیکونه رسیږي. د دې لپاره چي هره موضوع په دقت، بې‌ پرېتوب او مسئولانه ډول وارزول شي، د شکایتونو جوابونه د ترلاسه کېدو د نوبت، د موضوع د اهمیت او د اړوندې پروسې د مرحلې له مخې ورکول کېږي. له همدې امله، د جواب په برخه کي احتمالي ځنډ د شکایت د نه پاملرنې په معنا نه دی، بلکي د موضوع د منظمې ارزونې او اړوندو اداري او مسلکي پروسو د بشپړېدو له امله رامنځته کېږي.